VRF sistemində ən çox rast gəlinən nasazlıqlar və onların əlamətləri

Freon sızması

Əlamətləri: soyutma gücünün tədricən azalması, bəzi daxili bloklarda buz bağlaması, xarici blokda aşağı təzyiq xətası. Sızma çox vaxt flanş birləşmələrində və pis lehimlənmiş yerlərdə olur.

Sadəcə freon əlavə etmək problemi həll etmir. Sızmanı elektron detektor və ya azot sınağı ilə tapıb aradan qaldırmaq lazımdır.

Drenaj problemləri

Kaset tipli bloklardan su damcılaması ən çox rast gəlinən şikayətdir. Səbəb drenaj borusunun meylinin düzgün olmaması, tıxanma və ya kondensat nasosunun nasazlığıdır.

Rabitə xətaları

Daxili və xarici bloklar arasında rabitə kəsildikdə sistem həmin blokları görmür. Səbəb adətən zədələnmiş rabitə kabeli, zəif kontakt və ya elektrik kabeli ilə yan-yana çəkilmiş siqnal xəttidir.

Elektron genişlənmə klapanı

Klapan ilişib qaldıqda bir otaq həddən artıq soyuyur, digəri ümumiyyətlə soyumur. Bobinin müqaviməti ölçülür və klapanın mexaniki işi yoxlanılır.

Xarici blokun çirklənməsi

Damda yerləşən xarici bloklar yayda yüksək temperaturla işləyir. Çirkli istilikdəyişdirici yüksək təzyiq xətasına və qoruma dayanmalarına səbəb olur.